பட்டாணி புலாவ் ( பீஸ் புலாவ் )

பட்டாணி புலாவ் ( பீஸ் புலாவ் )

Peas Pulao

பீஸ் புலாவ் என்பது பெர்சிய நளபாகத்தில் இருந்து, முகலாய மன்னர்களால் இந்தியாவிற்கு தருவிக்கப் பட்ட ஒரு நறுமணம் மிக்க உணவு வகை ஆகும். பல நூற்றாண்டுகளாக இந்த உணவு, இந்திய சமையல் அறைகளில் முதல் இடம் வகிக்கிறது. பாரம்பரிய உணவான இதை ஆட்டுக்கறி மற்றும் லவங்க பட்டை கரம் மசாலா பொருள்களை கொண்டு சமைப்பர். சைவ பிரியர்கள் கறியை தவிர்த்து பல காய்கறிகளையோ அல்லது பனீர், காளான் ஆகியவற்றையோ சேர்த்து விதவிதமாக உண்ணலாம்.

யாழ் இனிதின் வாசகர், தோழர் ராஜசேகர் கோரிக்கைக்கு இணங்க, அவர் கேட்ட பீஸ் புலாவின் ருசியான செய்முறை இதோ !

செய்பொருள்கள் :

தரமான பச்சரிசி - 1 கோப்பை

தண்ணீர் – 2 ½ கோப்பை

கெட்டியான தேங்காய் பால் - ½ கோப்பை

பச்சை பட்டாணி -  ½ கோப்பை

நெய் - 2 தேக்கரண்டி

சமையல் எண்ணெய் – 2 தேக்கரண்டி

கிராம்பு - 3

பட்டை - 1 இஞ்ச் அளவு

ஏலக்காய் -  1 ; நசுக்கியது 

பிரியாணி இலை - 1

அன்னாசி மொக்கு - 1

பூண்டு -  4 ; நீளவாக்கில் அரிந்தது

பெரிய வெங்காயம்  - 1 ; நீளவாக்கில் அரிந்தது

பச்சை மிளகாய் – 2 ; நீளவாக்கில் அரிந்தது

உப்பு - சுவைக்கேற்ப 

செய்முறை :

1.  அரிசியை நன்றாக கழுவி, தண்ணீரில் 30 நிமிடங்கள் ஊற வைக்கவும்.

2.  ஒரு குக்கரில் நெய் + எண்ணையை சுட வைக்கவும்.

3.  சூடானதும் கிராம்பு, பட்டை, பிரியாணி இலை, மொக்கு மற்றும் ஏலக்காயை சேர்க்கவும்.

4.  சில நொடிகள் வறுத்துவிட்டு அரிந்த பூண்டு, வெங்கயம் மற்றும் பச்சை மிளகாயை சேர்க்கவும்.

5.  வெங்காயம் பொன் நிறமாக மாறும் வரை வறுக்கவும்.

6.  பட்டாணியை சேர்த்து சில நிமிடம் வதக்கி விட்டு, தணலை குறைத்து கொள்ளவும்.

7.  அரிசியிலிருந்து நீரை நன்கு வடித்துவிட்டு தாளித்த பொருள்களுடன் வறுக்கவும். அரிசி நன்கு காய்ந்து, பளபளப்பாக மாறும் வரை வறுக்கவும்.

8.  இப்போது நீரையும் தேங்காய் பாலையும் ஒன்றாக கலந்து குக்கரில் ஊற்றி நன்கு கலக்கவும். இரண்டையும் சேர்த்து தான் ஊற்ற வேண்டும். தேங்காய் பாலை அப்படியே கெட்டியாக ஊற்றினால், திரிந்து போகும் வாய்ப்பு அதிகம்.

9. இந்த கலவை கொதிநிலையை அடைந்தவுடன் தேவையான அளவு உப்பு சேர்த்து, மூடியால் மூடி விட்டு சமைக்கவும்.

10. 3 விசில்கள் வரவிட்டு, அடுப்பின் தீயை குறைத்து மீண்டும் 1 விசில் வரும்வரை (அ) அதிகபட்சம் 5 நிமிடங்கள் சமைக்கவும்.

9.  5 நிமிடங்கள் கழித்து நெய்யில் வதக்கிய முந்திரி பருப்பு மற்றும் திராட்சை தூவி அலங்கரித்து (விருப்பப்பட்டால்) பரிமாறவும்.

எலுமிச்சை சாதம்

எலுமிச்சை சாதம்

நான்காயிரம் ஆண்டுகளுக்கு மேலாக எலுமிச்சம் பழத்தின் மருத்துவ குணமும் உணவின் உபயோகமும், மனிதர்களுக்கு நோய் வராமல் பாதுகாக்க பயன்படுகிறது. எலுமிச்சை பழத்தில் நிறைந்திருக்கும் சிட்ரிக் ஆசிட், களைப்பு போக்கியாகவும், கிருமி நாசினியாகவும், பசி ஊக்குவிப்பானாகவும் பணிபுரிகிறது. மணமும் குணமும் நிறைந்த எலுமிச்சை சாதம், அனைவரும் விரும்பத்தக்க ஒரு உணவாக வெற்றி நடை போடுகிறது !

தேவையான பொருள்கள் :

பச்சரிசி சாதம் - 1 கப் ; உதிரியாக வேக வைத்து வடித்தது

எலுமிச்சம் பழம் - 2 (அ) 3 ; சாறு பிழிந்தால் 6 தேக்கரண்டி அளவு

சமையல் எண்ணெய் - 3 தேக்கரண்டி

கடுகு - 1/2 தேக்கரண்டி

உளுத்தம் பருப்பு - 2 தேக்கரண்டி

கடலை பருப்பு - 1 தேக்கரண்டி

பச்சை வேர்க்கடலை - 4 தேக்கரண்டி

பச்சை மிளகாய் - 2 ; 1/2 இன்ச் துண்டுகளாக நறுக்கியது

இஞ்சி - 1/2 இன்ச் துண்டு ; சன்னமாக நறுக்கியது

சிகப்பு பட்டை மிளகாய் - 1 ; பாதியாக வெட்டியது

மஞ்சள் தூள் - 1/4 தேக்கரண்டி

பெருங்காய தூள் - 1/4 சிட்டிகை

உப்பு - தேவைக்கேற்ப

கறிவேப்பிலை - 2 கொத்து

கொத்தமல்லி தழை - அலங்கரிக்க

தயாரிக்கும் முறை :

1)  ஓரு அகன்ற வாணலியில் எண்ணெயை சூடாக்கி, கடுகை தாளிக்கவும்.

2)  அவை வெடித்ததும், உளுத்தம் பருப்பு, கடலை பருப்பு, வேர்க்கடலையை சிவக்க வறுக்கவும்.

3)  நறுக்கிய பச்சை மிளகாய், இஞ்சி, காய்ந்த சிகப்பு மிளகாய், கறிவேப்பிலை சேர்த்து சில நிமிடம் வறுக்கவும்.

4)  பின்பு பெருங்காய தூள், மஞ்சள் தூள், உப்பு சேர்த்தவுடன் உடனடியாக அடுப்பை அணைத்து விடவும்.

5)  5 தேக்கரண்டி அளவு எலுமிச்சை சாற்றை அதில் ஊற்றவும்.

6)  வேகவைத்த சாதத்தை அதனுடன் இணைத்து நன்கு கலக்கவும்.

7)  ருசி பார்த்து, புளிப்பு சுவை குறைவாக இருந்தால், மிச்சம் இருக்கும் சாற்றை கலக்கவும்

8)  கொத்தமல்லி தழை தூவி, அப்பளம், துவையல், தயிர் பச்சடி ஆகியவற்றுடன் பரிமாறவும்.

கேரட் சாதம்

கேரட் சாதம்

கேரட்டை ‘தாவரத் தங்கம்’ என்று கூறுவதற்குக் காரணம் என்னவென்றால் தங்கத்தை அணிவதால் மேனிக்கு மெருகு கிடைப்பது போல, கேரட்டை அவ்வப்போது உணவில் சேர்த்துக் கொள்வதால், தங்கம் போன்று மேனி பளபளக்கும் என்பதே ! புற்றுநோய் வராமல் தடுப்பதில் கில்லாடியான கேரட்டில் நார்ச் சத்து அதிகம் உள்ளதால் செரிமானத்தை தூண்டி நல்ல ஜீரண சக்தியையும் அளிக்கிறது. இத்தனை சிறப்பு வாய்ந்த கேரட்டில் எளிதாக செய்யக்கூடிய ஒரு சாத வகை இதோ உங்களுக்காக :

தேவையான பொருள்கள் :

பச்சரிசி சாதம் - 2 கப் ; வேக வைத்தது

கேரட் - 1 கப் ; துருவியது

பெரிய வெங்காயம் – 1 ; நீளவாக்கில் நறுக்கியது

தக்காளி - 1 ; சன்னமாக நறுக்கியது

புதினா இலைகள் - 10

பச்சை மிளகாய் - 4 ; நீளவாக்கில் வெட்டியது

முந்திரி பருப்பு - 10 ; இதற்கு பதிலாக வேர்க்கடலையும் பயன்படுத்தலாம்

இஞ்சி பூண்டு பசை - 1 மேஜை கரண்டி

நெய் - 1 தேக்கரண்டி

சமையல் எண்ணெய் - 3 தேக்கரண்டி

லவங்கம் - 3

பட்டை - 1 இன்ச் துண்டு

ஏலக்காய் - 1

கரம் மசாலா தூள் - 1/2 தேக்கரண்டி

மிளகாய் தூள் - 1 தேக்கரண்டி

மல்லி தூள் - 1 தேக்கரண்டி

மஞ்சள் தூள் - 1/4 தேக்கரண்டி

கறிவேப்பிலை கொத்தமல்லி தழை - நறுக்கியது

உப்பு - தேவைக்கேற்ப

செய்முறை :

1)  ஓரு கடாயில் எண்ணெய் மற்றும் நெய்யை சூடாக்கவும்

2)  லவங்கம், பட்டை, ஏலக்காய்யை வதக்கி முந்திரி சேர்த்து வறுக்கவும்

3)  முந்திரி சிவந்ததும், புதினா இலைகள், வெங்காயம், பச்சை மிளகாய் சேர்த்து வதக்கவும்

4)  வெங்காயம் பொன்னிறமானதும் இஞ்சி பூண்டு பசையை ஒரு நிமிடம் வதக்கி தக்காளியை நன்றாக கலக்கவும்.

5)  இப்போது துருவிய கேரட்டை இணைத்து, உப்புடன் வதக்கவும்.

6)  மஞ்சள் தூள், மல்லி தூள், மிளகாய் தூள், கரம் மசாலா ஆகியவற்றை ஒவ்வொன்றாக சேர்த்து எண்ணெய் பிரியும் வரை வதக்கவும்.

7) பச்சை வாசனை போனதும், சமைத்த சாதத்தை போட்டு கிளறி, கறிவேப்பிலை கொத்தமல்லி தூவி பரிமாறவும்.

நெய்ச்சோறு

நெய்ச்சோறு

சுவையான, எளிமையான முறையில் மசாலா மற்றும் சிறிய அளவு நெய் கொண்டு செய்யப்படும் இது, சைவக்குழம்பு, கோழி மற்றும் இரால் குழம்புடன் செவ்வனே சேரும்.

செய்பொருள்கள் :

1 கோப்பை - தரமான பச்சரிசி

3 கோப்பை - தண்ணீர்

1 வெங்காயம்  - மெலிதாக வெட்டப்பட்டு

2 பச்சை மிளகாய் - பாதியாக வெட்டப்பட்டு

2 கிரம்புகள்

சிறிது சோம்பு

1 பிரியாணி இலை

1 ஏலக்காய்

பட்டை  - 1 இஞ்ச் அளவு

1 தேக்கரண்டி      - நெய்

சுவைக்கேற்ப்ப     - உப்பு

செய்முறை :

1.  அரிசியை நன்றாக கழுவி, தண்ணீரில் 30 நிமிடங்கள் ஊற வைக்கவும்.

2.  ஒரு குக்கரில் நெய்யை சுட வைக்கவும்.

3.  அத்துடன், கிராம்பு, பட்டை, சோம்பு, பிரியாணி இலை மற்றும் ஏலக்காயை சேர்க்கவும்.

4.  சில நொடிகள் வறுத்துவிட்டு, வெங்கயமும் பச்சை மிளகாயும் சேர்க்கவும்.

5.  வெங்காயம் பொன் நிறமாக மாறும் வரை வறுக்கவும்.

6.  இப்போது , இள வெப்பத்தில் அடுப்பை வைத்து,அரிசியிலிருந்து நீரை வடித்துவிட்டு, நெய்யுடன் சேர்த்து வறுக்கவும். அரிசி நன்கு காய்ந்து, பளபளப்பாக மாறும் வரை வறுக்கவும்.

7.  3 கோப்பைகள் வெந்நீரை ஊற்றி, அது கொதிநிலையை அடைந்தவுடன் தேவையான அளவு உப்பு சேர்த்து, மூடியால் மூடி விட்டு சமைக்கவும்.

8.  3 விசில்கள் வரவிட்டு, அடுப்பின் ஜ்வாலையை குறைத்து மீண்டும் 1 விசில் வரும்வரை (அ) அதிகபட்சம் 5 நிமிடங்கள் சமைக்கவும்.

9.  15 நிமிடங்கள் ஆறவைத்துவிட்டு, சுவையான வெஞ்சனத்துடன் பரிமாறவும்.

விருப்பத்திற்கேற்ப அலங்கரிக்க :

நெய்யை சுடவைத்து, அதனுடன் முந்திரிபருப்பு மற்றும் திராட்சை கலந்து வறுத்து, பிறகு இறக்கி வைக்கவும்.

வெங்காயத்தை நன்கு எண்ணெயுடன் பொன் நிறமாக வறுத்துவிட்டு, இறக்கி வைத்துகொள்ளவும்.

நெய்ச்சோறு பரிமாறும் முன்பு, இவைகளை மேலோட்டமாக சேர்த்து விட்டு பரிமாறினால், மேலும் சுவை மிகுந்து அமையும்.