முட்டை பொரியல்

முட்டை பொடிமாஸ் (அ) முட்டை பொரியல்

மிக எளிதாக விரைவில் செய்யக்கூடிய முட்டை பொடிமாஸ், சுவையானதாக மட்டும் இல்லாமல், ப்ரெட், ரொட்டி மற்றும் சாதத்துடன் நன்கு பொருந்தகூடிய ஒரு உணவு பதார்த்தமாகும்.

வேண்டிய பொருள்கள் :

முட்டைகள் - 3

சமையல் எண்ணை - 1 தேக்கரண்டி

பெரிய வெங்காயம் - 1 ( நறுக்கப்பட்டது)

இஞ்சி - 1/2 தேக்கரண்டி (நன்கு மசித்தது )

பச்சை மிளகாய் - 1 (நீளமாக நறுக்கப்பட்டது)

குடமிளகாய் - 1/4 கப் (விருப்பமிருந்தால் )

கடுகு - 1/2 தேக்கரண்டி

உளுந்து - 1/2 தேக்கரண்டி

காய்ந்த வெந்தயக் கீரை  (கசூரி மேத்தி) - 1/2 தேக்கரண்டி

கொத்தமல்லி - 5 கூறுகள் (நன்கு மசிக்கபட்டது )

கறிவேப்பிலை - 1 கூறு (நன்கு மசிக்கபட்டது )

உப்பு - தேவையான அளவு

செய்முறை :

1. முட்டைகளை நன்கு கலக்கி அடித்து வைத்து கொள்ளவும்.

2. ஒரு நான்-ஸ்டிக் வாணலியில் எண்ணையை சுட வைத்துகொள்ளவும்.

3. எண்ணை சூடான பின்பு அதில் கடுகு மற்றும் உளுந்தை சேர்க்கவும்.

4. கடுகு வெடித்தவுடன், அதனுடன் காய்ந்த வெந்தயக் கீரையை சேர்த்து, 20 நொடிகளுக்கு வறுக்கவும்.

5. பின்பு அதனுடன், நறுக்கிய வெங்காயம், பச்சை மிளகாய், குடமிளகாய்,இஞ்சி, கறிவேப்பிலை,மற்றும் கொத்தமல்லியை சேர்க்கவும்.

6. வெங்காயம் பொன் நிறமாக மாறும் வரை 2-3 நிமிடங்களுக்கு சமைக்கவும்.

7. இப்போது அதனுடன், மஞ்சள் தூள் மற்றும் உப்பை சேர்க்கவும்.

8. சில நிமிடங்கள் சமைத்துவிட்டு ,பின்பு சிறிது தண்ணீரை தெளிக்கவும்.

9. இப்போது கலக்கிய முட்டையிலும் சிறிது உப்பு தூவி விட்டு வாணலியில் சேர்க்கவும்.

10. மற்ற பொருட்களுடன் முட்டையும் கலக்கும் வண்ணம் நன்கு கிளறி விடவும்.

11. வேண்டிய பதம் அடையும் வரை நன்கு கிளறிவிடவும்.

நெஞ்செலும்பு சூப் ( எளிய செய்முறை )

நெஞ்செலும்பு சூப் ( எளிய செய்முறை )

உணவின் தொடக்கமாக அருந்தக் கூடிய சுவை மிகுந்த ஒரு செய்முறை உள்ளதென்றால் அது நெஞ்செலும்பு சூப் என கூறலாம். எளிதாக சமைக்க கூடிய இது, நம் இரத்த ஓட்டத்தை சீராக்கி, வயிற்றுப்போக்கை கட்டுப்படுத்த வல்லது. செட்டிநாட்டு சமையல் முறையில் இது பல்வேறு விதமாக சமைக்கப் பட்டாலும் இங்கு நான் உங்களோடு பகிர்ந்து கொள்வது எளிதான ஒன்றாகும். இம்முறை மென்காரமாக செய்யப்படுவதால், முதியவர்கள் மற்றும் குழந்தைகளுக்கு ஏற்புடைய சூப்பாக இது விளங்கும்.

தேவையான பொருள்கள் :

ஆட்டு நெஞ்செலும்பு துண்டுகள் - 1 கப்

பெரிய வெங்காயம் - 1 ; சதுரமாக வெட்டப்பட்டது

இஞ்சி - 1/2 இன்ச் துண்டு ; துருவியது

பூண்டு - 1 பல் ; மசித்தது

மிளகு தூள் - 1 தேக்கரண்டி

கொத்தமல்லி தழை - கையளவு ; அரிந்தது

வெங்காய தாள் (விரும்பினால் ) - 1

உப்பு - தேவையான அளவு

செய்முறை :

1)  ஒரு குக்கரில் நன்கு கழுவப்பட்ட சுத்தமான நெஞ்செலும்பு துண்டுகளை இட்டுக் கொள்ளுங்கள்.

2)  அதனுடன் பெரிய வெங்காயம், இஞ்சி, பூண்டு, வெங்காய தாள், மற்றும் சிறிதளவு உப்புடன் கொஞ்சம் கொத்தமல்லியையும் கலந்து விடுங்கள்.

3)  குக்கரை நன்கு மூடி விட்டு அதன் மீது 'விசில்' பொருத்தி மிதமான வெப்பத்தில் 5 விசில்கள் வரும் வரை சமைக்கவும்.

4)  இப்போது அடுப்பின் ஜ்வாலையை குறைத்து விட்டு மீண்டும் 10 நிமிடங்கள் அல்லது 1 விசில் வரும் வரை வேக விடவும்

5)  அடுப்பை அணைத்து விட்டு பிரஷர் முழுதும் அடங்கும் வரை காத்திருக்கவும்

6)  குக்கரை திறந்து, மெல்லிய ஜ்வாலையில் கொதிக்க விட்டு மிளகு தூள் மற்றும் மீதமுள்ள கொத்தமல்லியை சேர்க்கவும்

  

7)  இரண்டு நிமிடங்கள் நன்கு கலக்கி, அடுப்பிலிருந்து இறக்கி, சூடாக ஏதேனும் கொரிப்பானுடன் பரிமாறவும்.

வறுத்த கோழி

வறுத்த கோழி

கோழி சூப் புடன் அருமையான ஆரம்ப உணவாக வறுத்த கோழி சாப்பிடலாம். இது சாம்பார் சாதம், ரஸம் மற்றும் தயிர் சாதத்தோடு ருசியாக இருக்கும்.

தேவையான பொருள்கள் :

கோழி துண்டுகள் - ½ கிலோ

இஞ்சி – 1 இன்ச் துண்டு

பூண்டு – 5 பல்; உரித்தது

கெட்டி தயிர் - ½ கப் ; கடைந்தது

மஞ்சள் தூள் - ¼ தேக்கரண்டி

மிளகாய் தூள் - 1 ½ தேக்கரண்டி

மல்லி தூள் – 2 தேக்கரண்டி

கோழி மசாலா (அ) கரம் மசாலா - 1 தேக்கரண்டி

மிளகு தூள் – ½ தேக்கரண்டி

உப்பு - தேவைக்கேற்ப

சமையல் எண்ணெய் - வறுக்க தேவையான அளவு

சன்னமாக நறுக்கப்பட்ட வெங்காயம் - அலங்கரிக்க

கொத்துமல்லி இலை - அலங்கரிக்க

செய்முறை :

1) கோழியை நன்கு கழுவவும். இஞ்சி பூண்டை கொரகொரப்பாக அரைத்துக்கொள்ளவும்.

2) ஒரு அகலமான கிண்ணத்தில் கோழித் துண்டுகள், இஞ்சி பூண்டு பசை, கடைந்த தயிர், மஞ்சள் தூள், மிளகாய் தூள், மல்லி தூள், கோழி மசாலா, உப்பு ஆகியவற்றை ஒன்றாக சேர்த்து நன்கு கலந்து 10 நிமிடங்கள் ஊற வைக்கவும்.

3) பிறகு, ஒரு பாத்திரத்தில் இந்த கலவையை வைத்து, கொஞ்சமாக நீர் தெளித்து, மூடியால் மூடி, கோழி வேகும் வரை சமைக்கவும்.

4) கோழி வெந்தவுடன், மூடியை திறந்து மிச்சம் இருக்கும் நீர் எல்லாம் காயும் படி சமைக்க வேண்டும். கோழி மிகவும் வெந்து விடாமல் பார்த்து கொள்வது அவசியம். மசியும் அளவுக்கு வெந்து விட்டால், வறுப்பதற்கு கஷ்டமாக இருக்கும்.

5) கடைசியாக, மிளகு தூள் சேர்த்து, கோழி மசியாமல் நன்கு கிளறவும்.

6) இதை 30 நிமிடங்கள் ஆற விடவும். ஆற வைப்பது மிகவும் அத்தியாவசியமான ஒன்றாகும். ஏனென்றால், சூடான கோழியை வறுத்தால், மசிந்து விடுவதோடு சரியாக வறுபடாது.

7) ஒரு நான் ஸ்டிக் கடாயில் எண்ணெய் கொஞ்சமாக ஊற்றி, 3-4 கோழி துண்டுகளை அதில் வைத்து, திருப்பி திருப்பி நன்கு வறுத்து எடுக்கவும். இவ்வாறே மற்ற எல்லா துண்டுகளையும் பொறுமையாக வறுக்கவும்.

8) சன்னமாக நறுக்கப்பட்ட வெங்காயம் மற்றும் கொத்துமல்லி இலை கொண்டு அலங்கரிக்கவும். 

கோழி க்ளியர் சூப்

கோழி க்ளியர் சூப்

கோழி க்ளியர் சூப் ஒரு சிறந்த பசி ஊக்குவிக்கும் ஆரம்ப உணவு மட்டும் இல்லாது ருசியானதும் சத்தானதும் கூட. இங்கு கொடுக்கப்பட்டிருக்கும் சமையல் முறை மற்ற முறைகளை விட வித்தியாசமானதால், இதை கண்டிப்பாக செய்து பார்க்குமாறு பரிந்துரைக்கிரேன்.

தேவையான பொருள்கள் :

கோழி  – 6 துண்டுகள்

வெண்ணெய் – 1 தேக்கரண்டி

கிராம்பு – 1 ; நசுக்கியது

பட்டை – ¼ இன்ச் துண்டு; நசுக்கியது

பிரியணி இலை - 1

பூண்டு – 1 தேக்கரண்டி; பொடிதாக நறுக்கியது

இஞ்சி – 1 தேக்கரண்டி; பொடிதாக நறுக்கியது

சிறிய பச்சை மிளகாய் - 1 ; பொடிதாக நறுக்கியது

சின்ன வெங்காயம் - 3 ; பொடிதாக நறுக்கியது

மிளகு தூள் – ½ தேக்கரண்டி

வெங்காய தாள் – 1 ; நறுக்கியது

கொத்துமல்லி இலை - 1 தேக்கரண்டி

உப்பு - தேவைக்கேற்ப

செய்முறை :

1) கோழியை நன்கு கழுவி நடுத்தர துண்டுகள் ஆக்கவும். சிறு மென்மையான எலும்புகளையும் உபயோகிக்கலாம். அவை நறுமணம் தருவதுடன் சத்தானதும் கூட.

2) ஒரு குக்கரில் வெண்ணெயை சூடாக்கி, கிரம்பு பட்டை மற்றும் பிரியாணி இலையை சேர்க்கவும்.

3) நன்கு வதக்கி விட்டு பூண்டு, இஞ்சி, பச்சை மிளகாய் மற்றும் வெங்காயம் சேர்க்கவும்.

4) அதையும் வதக்கி கோழி துண்டுகளை சேர்த்து வறுக்கவும்.

5) சில நிமிடங்களுக்கு பிறகு, உப்பு மற்றும் 2 கப் நீர் சேர்க்கவும்

6) குக்கரை மூடி 3 விசில் அல்லது 10 நிமிடம் சமைக்கவும்

7) ப்ரஷர் முழுவதும் இறங்கியதும், அதை ஒரு வடி கட்டியில் வடிக்கவும்.

8) இந்த "கோழி வடி நீர்" உடன் கோழி துண்டுகைளய் மட்டும் சேர்க்கவும். இதனுடன் 3 கப் நீர் ஊற்றி அடுப்பில் வைக்கவும்

9) வடி நீர் கொதித்தவுடன் மிளகு தூள், வெங்காய தாள், மற்றும் கொத்தமல்லி தழை சேர்க்கவும்

10) 2 நிமிடங்களுக்கு மேல் சமைக்க வேண்டாம். அடுப்பை அணைத்து விட்டு வறுத்த கோழி உடன் பரிமாறுங்கள்.